Լաստանավային տարբերակով բեռնափոխադրումը $1000-ով ավելացնում է տրանսպորտային փոխադրումների ծախսը. Վ. Խաչատրյան
20.07.2017
Եթե մենք նավթ, գազ չունեցող երկրի տրամաբանությամբ կախված ենք Վրաստանից, ապա դա պատերազմական իրավիճակում կարող են անգամ մեր թշնամիներն օգտագործել: Այսպիսի հայտարարություն է արել տնտեսագետ Վիլեն Խաչատրյանը «Երկիր մեդիա» հեռուստաընկերության «Երկրի հարցը» հաղորդման եթերում՝ անդրադառնալով աբխազական երկաթգծի և հարավօսական ճանապարհի հեռանկարին:
Ըստ նրա՝ սրանք առաջին հերթին այլընտրանք են Հայաստանի համար: Տնտեսագետը հիշեցրել է, որ բազմիցս ենք ականատես եղել, թե Լարսի ճանապարհի փակվելն ինչ հետևանքներ է ունեցել, դեպքեր եղան ոչ միայն ձմռանը, նաև ՝ամռանը, թե ինչ լուրջ դժվարություններ են առաջանում հոսքերի հետ կապված: Ինչ վերաբերում է լաստանավային տարբերակին, Վիլեն Խաչատրյանի տվյալներով, դա արդեն հազար դոլարով ավելացնում է տրանսպորտային փոխադրումների ծախսը:
«Երկու տիպի արտահանման սխեմաներ ունենք, դեպի Ռուսաստան, Եվրոպա և այլն, և դեպի ասիական տարածաշրջան և արաբական աշխարհ: Վրաստանը մոտ 70 տոկոսով աջակցություն է ցուցաբերում արտահանման ուղղությամբ և մոտ 80 տոկոս՝ ներմուծման մեջ: Մեր առևտրաշրջանառության վրացական բաղադրիչը բավականին մեծ է: Այսինքն՝ այս տեսանկյունից մենք դիվերսիֆիկացման կարիք ունենք»,-պարզաբանել է տնտեսագետը:
Նրա կարծիքով՝ ցանկացած փակվող ճանապարհ լուրջ ազդեցություն կունենա Հայաստանի տնտեսության վրա: Նա հիշեցրել է 2008թ., երբ միանգամից գները թանկացան, անգամ վառելիքի խնդիր էր առաջացել: Այդ ճանապարհը մեզ համար ոչ միայն պարենային, այլ նաև ռազմավարական նշանակություն ունի:
Անդրադառնալով աբխազական երկաթգծի և հարավօսական ճանապարհի բացմանը, ռուս-վրացական կոնֆլիկտին՝ Վիլեն Խաչատրյանը նշել է. «Աշխարհում 300-ից ավելի չճանաչված պետություն գոյություն ունի: Աբխազիան և Օսիան ևս այդ դասակարգման մեջ են: Այդ փակ սահմաններն ամբողջ աշխարհի տնտեսական զարգացման ընթացքի վրա ազդող գործոններ են: Նույն տրամաբանությամբ ինչքան օգուտ կունենայինք, եթե այդ ճանապարհները բաց լինեին: Ի՞նչ կլիներ, եթե այդ Լարսի դեպքերը չունենայինք և այդքան վնաս չունենայինք»,-ասել է Վիլեն Խաչատրյանը:
Ըստ նրա՝ ամեն մի նման դեպքը, մի քանի օրն անգամ, մեր արտահանողների կամ ներմուծման համար լուրջ վնաս է և լուրջ հարված է երկրի տնտեսությանը:



.jpg)
