Նորություններ

«Վերին Լարսում» Հայաստանի ներկայացուցիչը շուտով կսկսի աշխատել

24.02.2020

«Վերին Լարս» հսկիչ անցակետում Հայաստանի ներկայացուցիչը շուտով կլինի ծառայության վայրում: Այս մասին փետրվարի 24-ին ԱԺ Եվրասիական եւ տարածաշրջանային հարցերով մշտական հանձնաժողովի նիստում «Եվրասիական տնտեսական միության մաքսային սահմանով փոխադրվող ապրանքների եւ միջազգային փոխադրումն իրականացնող տրանսպորտային միջոցների մասին տեղեկությունների փոխանակման մասին» համաձայնագրի վավաերացման հարցի քննարկման ժամանակ ասաց Պետեկամուտների կոմիտեի նախագահ Դավիթ Անանյանը:

Նրա խոսքով՝ կան կազմակերպական հարցեր, որոնք անհրաժեշտ է լուծել առաջիկա շրջանում: «Նա պետք է սկզբում ներկայանա ռուսական մաքսային մարմիններին: Ամեն դեպքում, մեր ներկայացուցիչը որքան վաղ այնտեղ լինի, այնքան լավ: Նստավայրը կլինի Վլադիկավկազում: Բայց մենք շահագրգռված ենք, որ մեր նստավայրը լինի հենց տեղում, չնայած 30 կմ հեռավորությունը այնքան էլ մեծ խնդիր չէ»,- ասաց Անանյանը:

ՊԵԿ նախագահը նաեւ հայտնեց, որ Լարսում հայ ներկայացուցիչը մենակ է աշխատելու՝ աշխատակազմ չունենալով, սակայն կունենա դիվանգիտական կարգավիճակ:

Լրատվական աղբյուր՝ լրատվական-վերլուծական գործակալություն News.am: