1. Գլխավոր
2. Նորություններ
3. 2.5 տոննա և ավելի քաշ ունեցող բեռնատարներն այսօրվանից Երևանի կենտրոն կարող են մտնել երեկոյան 21-ից մինչև առավոտյան 7-ը

2.5 տոննա և ավելի քաշ ունեցող բեռնատարներն այսօրվանից Երևանի կենտրոն կարող են մտնել երեկոյան 21-ից մինչև առավոտյան 7-ը

13.11.2023

Այսօրվանից ուժի մեջ են մտնում Երևանի փոքր կենտրոնում բեռնատարների համար մուտքի նախատեսված նոր սահմանափակումները: Այս մասին այսօր՝ նոյեմբերի 13-ին, Երևանի քաղաքապետարանի գործակարգավարական հերթական խորհրդակցության ժամանակ հայտնեց քաղաքապետ Տիգրան Ավինյանը։

Նա շեշտեց, որ այս ծրագիրը Երևանի կենտրոնի բեռնաթափման համընդհանուր ծրագրի կարևոր մասերից է։

Քաղաքապետարանի տրանսպորտի վարչության պետի պաշտոնակատար Վազգեն Հարությունյանը մանրամասնեց, որ 2,5 տոննա և ավելի քաշ ունեցող բեռնատարները Երևան կարող են մտնել երեկոյան 21։00-ից մինչև առավոտյան 07։00-ը։

«Երթևեկությունը կարգելվի կենտրոնի բեռնաթափմանն ուղղված համալիր ծրագրի շրջանակում նոյեմբերի 13-ից Խանջյանից մինչև Սարյան և Գրիգոր Լուսավորչից մինչև Կորյուն հատվածներում, որը ներառում է շուրջ 40 փողոց։ «Ֆորդ տրանզիտ», կամ «Գազել» և նմանատիպ մակնիշի մեքենաներն ընկնում են այդ սահմանափակումների տակ»,- նշեց նա։